पुणे : नवीन ‘ऑडी ए४ ३५ टीएफएस आय’ ही कार नुकतीच येथे दाखल करण्यात आली. देशात आणि जागतिक पातळीवरही लोकप्रिय असलेल्या या मॉडेलमध्ये अनेक नाविन्यपूर्ण सुविधांचा समावेश करण्यात आला आहे. यामुळे या श्रेणीत ही कार नवीन मापदंड स्थापन करेल, असा कंपनीला विश्वास आहे.
कार्यक्षमता, आरामदायी ड्रायव्हिंग अनुभव आणि उच्च दर्जाची इन्फोटेनमेंट सिस्टीम याला सर्वाधिक प्राधान्य देण्यात आले असून तिची रुंदी आरामदायी अनुभवासाठी उत्तम आहे. निमुळत्या बाह्य रेषा तिला वेगळेच सौंदर्य बहाल करतात. हेडलाईटसमध्ये एलईडी तंत्रज्ञानाचा वापर करण्यात आला असून ‘ऑडी ए४’च्या नव्या आवृत्तीची ती खासियत आहे. आधीच्या मॉडेलपेक्षा या नवीन आवृत्तीत कारची डायमेंशन्स वाढवण्यात आली असली तरी वजन कमी करण्यात यश आले आहे.जवळपास १२० किलो वजन कमी करण्यात कंपनीला यश आले आहे. आधुनिक साहित्याचा आणि तंत्रज्ञानाचा वापर यामुळे या श्रेणीतील ही सर्वात कमी वजनाची कार ठरली आहे.
नवीन ‘ऑडी ए४ ३५ टीएफएसआय’ मध्ये १.४ लिटर क्षमतेचे टीएफएसआय इंजिन असून नवीन कम्बशन सिस्टीममुळे इंधन कार्यक्षमता वाढवण्यात यश आले आहे. नवीन ‘ऑडी ए ४ ३५ टीएफएसआय’ मधील अंतर्गत सजावट अत्यंत उंची आणि प्रशस्त आहे. कम्फर्ट, डायनामिक, ऑटो आणि वैयक्तिक अशा चार वेगवेगळ्या प्रकारचे ड्राईव्ह मोड सिलेक्ट करण्याची यात सुविधा आहे. त्यामुळे एकाच कारमध्ये चार कारचा अनुभव घेता येतो. सुरक्षिततेला ऑडीने नेहमीच प्रथम प्राधान्य दिले आहे. या कारमध्ये ८ एअरबॅग्ज असून पार्किंगसाठी विशेष सहायक यंत्रणा आहे. अशी माहिती कंपनीने दिली आहे.